Қазақстандық әртістер Финляндияның жетекші сахналарында өнер көрсетеді

«Астана Операның» жетекші солисі, Қазақстанның еңбек сіңірген қайраткері Еркін Рахматуллаев пен театр солисі София Әділханова British Festival Ballet балет труппасының ауқымды финдік турнесінің шақырылған жұлдыздарына айналады. Әртістер Финляндияның ірі қалаларында өтетін бірқатар гастрольдік спектакльге қатысады.

Қазақстандық балет жұбы П.Чайковскийдің «Аққу көлі» танымал балетінде Зигфрид ханзада мен Одетта-Одиллияның басты партияларында еуропалық көрермендердің алдына шығады. Гастрольдің мазмұнды кестесі елдің төрт ірі мәдени орталығын қамтиды: 20 қазанда әртістер Лахтидегі Сибелиус атындағы концерт залы сахнасына шығады, 22 қазанда өнер көрсету Туркудегі «Логомо» мәдениет орталығында өтеді. 23-24 қазанда Хельсинкидегі «Финляндия» концерт залында ауқымды спектакльдер ұсынылады. Турне 25 қазанда Йювяскюля қаласының «Павильонки» орталығындағы өнер көрсетумен аяқталады.

Орындаушылық шеберлігі Италия, Испания, Словения, БАӘ, Оман, Қытай мен басқа да елдердің көрермендеріне жақсы таныс қазақстандық биші Еркін Рахматуллаев үшін бұл гастроль халықаралық мансабындағы тағы бір маңызды кезеңге айналады.

— Әрбір шетелдік сахна – бұл бірегей тәжірибе, зор жауапкершілік және қазақстандық балет мектебін ең жоғары дәрежеде көрсетуге мүмкіндік. Мұндай ауқымды өнер көрсетулерге дайындық көп күш салуды талап етеді. Біз өзіміздің көркемдік жетекшіміз Алтынай Абдуахимовна Асылмұратоваға шынайы алғысымызды білдіреміз. Оның сенімі, жоғары кәсіби талаптары мен шығармашылық қолдауы бізге кез келген әлемдік сахнаға тайсалмай шығуға және классикалық репертуардың жаңа қырларын ашуға көмектеседі, — деп атап өтті Еркін Рахматуллаев.

Осынау турнеде нәзік ақ аққу мен құштар қара аққудың жетекші әйел партияларын «Астана Операның» дарынды балет солисі София Әділханова орындайды. Келешегінен үлкен үміт күттіретін жас балерина классиканы бағалайтын елордалық көпшіліктің жүрегін театрдың көптеген спектакліндегі басты рөлдерді терең интерпретациялауымен әлдеқашан жаулап алған еді. «Аққу көліндегі» Одетта мен Одиллияның бейнелерінен бөлек, оның репертуарында П.Чайковскийдің «Щелкунчигіндегі» Мари, Б.Асафьевтің «Бақшасарай бұрқағындағы» Зарема, А.Хачатурянның «Спартагындағы» Эгина, Л.Минкустың «Баядеркасындағы» Гамзатти, Г.Левенскольдтің аттас балетіндегі Сильфида бар. Сондай-ақ ол жас қазақстандық хореограф С.Ғұмардың «Мәңгіліктің төрт сыры», Р.Петидің «Кармен», И.Килианның «Кіші өлім» және М.Фокиннің «Шопениана» спектакльдеріндегі жетекші партияларды орындап келеді.