Мемлекет басшысы Өзбекстан Президентімен келіссөз барысында саяси және экономикалық байланыстарды жандандыра түсетін жаңа бағыттар айқындалғанын жеткізді

– Өзара ынтымақтастық әлеуетін толық пайдалануды құптаймыз. Сондықтан осы бағытта табанды еңбек етуге дайын екенімізді айттық. Ең әуелі, сауда-экономика саласына ерекше мән беру керек. Сауда-саттықты дамыту үшін өсімнің тың мүмкіндіктерін іздеу, тауарлар номенклатурасын кеңейту және шикізаттық емес экспортты ынталандыру шараларын қабылдау қажет. Осы орайда Өзара тауар айналымын арттыру бағдарламасын сапалы жүзеге асыру маңызды. Бүгін құрылатын Өңір басшылары кеңесін, сондай-ақ Іскерлік кеңес пен «UzKazTrade» бірлескен сауда компаниясы секілді басқа да екіжақты механизмдердің жұмысынан нақты нәтиже күтеміз, – деді Қазақстан Президенті.

Мемлекет басшысының айтуынша, ауыл шаруашылығы саласындағы ынтымақтастықтың әлеуеті зор. Қасым-Жомарт Тоқаев қарапайым саудадан гөрі ет, бидай, майлы дақылдарды өңдеудің толық өндірістік тізбесін қалыптастыруды, мал шаруашылығы мен органикалық егін шаруашылығын бірге дамытуды ұсынды. Бұл бағытта бірлескен ғылыми орталықтар құру, агротехникалық инновацияларды енгізу және ауыл шаруашылығы өнімдерін үшінші елдер нарықтарына бірге шығару мүмкіндіктері талқыланды. Президент бұл саланы Орталық Азиядағы ұзақ мерзімді азық-түлік қауіпсіздігін қамтамасыз етуге мүмкіндік беретін стратегиялық бағыт ретінде бағалады.

Бұған қоса Президент өнеркәсіп кооперациясына үлкен үміт артады.

– Қазіргі кезде жалпы сомасы бір жарым миллиард доллардан (1,7 млрд доллар) асатын 78 бірлескен жобамыз бар. Оның аясында 15 мыңнан астам жұмыс орнын ашу көзделген. Аталған жобалар толық іске асса, экономикалық және инвестициялық ықпалдастығымыз айтарлықтай күшейеді. Бүгін біз олардың бір парасын іске қосамыз. Қазақстанның Өзбекстанға салатын инвестициясын одан әрі ынталандыруға ниеттіміз. Бұл ретте өзбек достарымыздан әдеттегідей қолдау күтеміз. Құрылысы жүріп жатқан «Орталық Азия» халықаралық өнеркәсіп кооперациясы орталығы индустриалдық қуатымызды одан әрі арттыруда маңызды рөл атқарады, – деді Қасым-Жомарт Тоқаев.

Президент сонымен бірге көлік-логистика саласындағы ынтымақтастықты тереңдетудің маңызын атап өтті. Оның айтуынша, жаңа теміржол және автокөлік дәліздерін дамыту екі ел арасындағы жүк тасымалы көлемін айтарлықтай арттыруға мүмкіндік береді. Сондай-ақ транзиттік инфрақұрылымды бірлесіп жаңғырту Қазақстан мен Өзбекстанды ғана емес, жалпы өңірді байланыстыратын маңызды стратегиялық бастама болмақ. Бұл бағыттағы жұмыстар сауда мен инвестиция ағынын одан әрі күшейтіп, екі ел экономикасының бәсекеге қабілеттілігін арттыруға жол ашады.