Нұрсұлтан Назарбаевтың туыстарының қай елде үйі бар?

Жақында Халықаралық зерттеуші журналистер консорциумы (ICIJ) Тимур және Динара Құлыбаевтардың Еуропадағы жылжымайтын мүлкіне арналған картасын жариялады, деп хабарлайды Dalanews.kz журналист Дмитрий Шишкиннің зерттеуіне сілтеп.

Мәселен, Лондонның Бейкер-стритіндегі пәтерлерге иелік еткен Дариға Назарбаева туралы айтар болсақ. БАҚ мәліметінше, ол негізгі активтерін сатқанымен, кейбір мүліктері әлі де өзінде. Назарбаевтар Еуропадағы және басқа да шетелдегі жылжымайтын мүліктерді көптеген оффшорлық компаниялар арқылы иеленген.

Ұлыбритания: The Bishops Avenue, Лондон. Бенефициар: Нұрали Әлиев

Бишоп-авенюдегі үйге Дариға Назарбаеваның ұлы Нұрали Әлиев Кариб теңізінде тіркелген Manrick Private Foundation қоры арқылы иелік етеді. Британиялық реестр деректеріне сәйкес, 2014 жылғы бағалау бойынша бұл жылжымайтын мүліктің құны 1 миллион фунт стерлингтен асады.

32, Denewood Rd, Highgate. Бенефициарлар: Дариға Назарбаева, Эндрю Джон Бейкер

Бұл сарайға Лихтенштейнде тіркелген Villa Magna Foundation қоры иелік етеді. Британия реестрлерінің мәліметінше, бенефициарлар ретінде Дариға Назарбаева мен Эндрю Джон Бейкер көрсетілген. Бағалау құны – 9,3 миллион фунт стерлинг.

Мейфэр ауданы, Лондон. Бенефициар: Тимур Құлыбаев / Vitala Investment Holding S.à.r.I. (Люксембург) және Lynn Properties S.à.r.I. (Люксембург).

2007 жылы Тимур Құлыбаев бақылайтын бес компания Ұлыбританиядан жалпы құны 184 миллион АҚШ долларына алты жылжымайтын мүлік сатып алды. Сол алты мүліктің үшеуі Лондонның ең қымбат ауданы саналатын Мейфэрде орналасқан.

Ең қымбат төрт қабатты георгиан стиліндегі таунхаус 41 Upper Grosvenor St. мекенжайында орналасқан. Ол 2024 жылдың наурызында 44 миллион долларға сатылған.

Осы мекенжайға жақын 42 Upper Grosvenor St. ғимаратында Құлыбаевтың иелігіндегі төрт қабатты неоклассикалық ғимарат бар (Vitala Investment Holding S.à.r.I компаниясы арқылы сатып алынған). Люксембург компаниясының 2022 жылғы соңғы қаржылық есебіне сәйкес, бұл мүліктің құны шамамен 22 миллион доллар.

Сол кварталдың қарама-қарсы жағында Құлыбаев бақылайтын тағы бір люксембургтік Lynn Properties S.à.r.I компаниясына тиесілі екі қабатты үй 42 Reeves Mews мекенжайында орналасқан. 2022 жылғы қаржы есебінде оның құны 18 миллион доллар деп көрсетілген.

ICIJ мәліметтері бойынша, 2007 жылы Құлыбаев Лондонның Кенсингтон ауданындағы «миллионерлер көшесі» аталып кеткен жерде тағы екі жылжымайтын мүлік сатып алған. Жалпы құны – 54,5 миллион доллар. Бұл активтер Кайман аралдарында тіркелген APH Property Trust Ltd. компаниясы арқылы басқарылған. Құлыбаев «трасттың құрылтайшысы» ретінде көрсетілген. Айта кету керек, сол жылы Қазақстанның бұрынғы президентінің күйеу баласы Forbes журналының жаһандық байлар рейтингіне енген еді (Қазақстандық нұсқа әлі болмаған). Басылым оның байлығын 2,2 миллиард доллар деп бағалады.

Sunninghill Park, Лондон. Бенефициар: Тимур Құлыбаев / Unity Assets Corporation S.à.r.l. (Люксембург)

2007 жылы Тимур Құлыбаев Ұлыбритания патшайымы Елизавета II-нің ұлы, Йорк герцогы ханзада Эндрюден Sunninghill Park жер иелігін сатып алды. Бұл мүлікке 655 акр аумақ пен саябақ аймағы кіреді. Мүлік 15 миллион фунт стерлингке (шамамен 24 миллион доллар) сатып алынған. The Sunday Times басылымының хабарлауынша, сатып алушы бастапқы бағаға қарағанда 3 миллион фунт стерлинг артық төлеген. Ескі сарай бұзылып, оның орнына теннис корттары, бассейн, жаттығу залдары бар жаңа үй салынған.

Clarendon House, Лондон. Бенефициарлар: Тимур Құлыбаев және Динара Құлыбаева / Kaz Cam Centre Ltd. (Ұлыбритания)

Бұл таунхаус Кембридж университетінің тарихи Ботаникалық бағбақтарының жанында орналасқан. 2010 жылы оны британдық Kaz Cam Centre Ltd. компаниясы сатып алған. Бұл компания – Қазақстандағы коммерциялық жылжымайтын мүлік саласындағы ең ірі инвестициялық холдингтердің бірі Mercury Properties LLP-тің еншілес ұйымы.

Сатып алу бағасы: 3,6 миллион доллар. CaspianCabals порталының Кембридж қалалық кеңесіне сілтеме жасап жазуынша, үйдің бір бөлігі шетелден келген ғалымдар мен зерттеушілерге уақытша тұруға берілген.

Фото көрнекілік үшін интернеттен алынды