Шымкенттегі Ассамблея жастарының тәуелсіздікті дәріптейтін дебат турнирі қорытындыланды

Шымкент қалалық Достық үйінде Қазақстан халқы Ассамблеясы жанындағы «Ассамблея жастары» ұйымы мен «Мәміле» пікірсайыс клубының ұйымдастыруымен өткен «Тәуелсіз елдің тірегі – көшбасшы жастар» дебат турнирінің екінші кезеңі өтіп, өз мәресіне жетті. Бұл іс-шара жастардың көшбасшылық қасиеттерін дамытуға, өз пікірін айқын жеткізе білуге және сыни ойлау қабілетін жетілдіруге бағытталған маңызды бастамаға айналды. Турнир жастарды тек ойлануға емес, сонымен бірге бір-бірімен мәдениетті пікір алмасуға, қоғамдағы өзекті мәселелерді талқылауға талпындырды.

Дебат турнирінің мақсаты – жастар арасында Тәуелсіздік құндылықтарын насихаттау, көшбасшылық қасиеттерді арттыру және белсенді азаматтық ұстанымды қалыптастыру. Сонымен қатар, пікірсайыс мәдениетін дамыту арқылы қатысушылардың шешендік, аналитикалық және стратегиялық ойлау қабілеттерін жетілдіру көзделген. Мұндай іс-шаралар жастардың өзіне деген сенімін нығайтып, олардың қоғамдық өмірге белсенді араласуына мүмкіндік береді.

Финалдық кезең барысында командалар еліміздің дамуы, ұлттық бірлік пен қоғамдық келісімнің маңызы, жастардың қоғамдағы белсенді рөлі, заманауи әлеуметтік мәселелер және Тәуелсіздікті сақтау жолдары сияқты өзекті тақырыптарда ой-пікірлерін ортаға салды. Қатысушылар өздерінің көшбасшылық қабілеттерін көрсетіп, командалық жұмыстың, сындарлы пікірталастың және нақты дәлелдермен ойды жеткізудің маңыздылығын көрсетті.

Тартысты дода қорытындысында үздіктер анықталды:

«Достық» командасы – І орын

«Барбанг» командасы – ІІ орын

«Қазақ үні» командасы — ІІІ орын

Жеңімпаздар арнайы алғыс хаттармен және естелік сыйлықтармен марапатталды. Бұдан бөлек, барлық қатысушыларға қатысқандары үшін сертификаттар беріліп, турнир барысында көрсеткен белсенділігі мен шығармашылық қабілеттері атап өтілді. Бұл дебат турнирі жастарға өз пікірін ашық айтуға, жауапкершілік пен көшбасшылық қасиеттерді дамытуға, сондай-ақ елдің тұрақтылығы мен бірлігіне өз үлесін қосуға жол ашты.

Жалпы алғанда, «Тәуелсіз елдің тірегі – көшбасшы жастар» дебат турнирі жастарды қоғамдағы өзекті мәселелерге бей-жай қарамай, өз ой-пікірін дәлелді түрде жеткізуге, көшбасшылық қасиеттерін дамытуға ынталандыратын маңызды тәрбиелік шара болып саналады. Осындай іс-шараларды тұрақты түрде өткізу жастардың елге деген патриоттық сезімін арттырып, олардың болашақ көшбасшылар ретінде қалыптасуына серпін береді.