Алматыда кәсіпқой бокс кеші өтті

Қазақстанның спорттық өміріндегі елеулі оқиғалардың бірі — Алматы қаласында өткен кәсіпқой бокс кеші. Бұл ауқымды шараны Has Pro Boxing промоутерлік компаниясы ұйымдастырды. Кештің басты жекпе-жегі ауыр салмақтағы қазақстандық атақты боксшы Еділ Қожамбердиев пен албандық мықты қарсылас Алби Сорра арасында өтті. Осы кездесуде тұңғыш рет WBC Turan чемпиондық белбеуі тігілді. Белгілі WBC ұйымының тарихында алғаш рет түркі мемлекеттері мен ислам елдерінен шыққан боксшыларға арналған арнайы чемпиондық белбеу ұсынылды.

Бұл белбеу күллі түркі халықтарының спорттағы беделін нығайту мақсатында әзірленген және Еділдің алдағы жекпе-жегін ерекше мәртебеге ие етіп отыр.Кештің басты жекпе-жегінен бөлек, бокс жанкүйерлеріне тағы бір қызықты айқас ұсынылды. Дәулет Қаби есімді қазақстандық спортшы әзірбайжандық Рамал Амановқа қарсы рингке шығып, WBC Asia Silver чемпиондық белбеуін сарапқа салып,спортшымыз жеңіске жетті.. Бұл белбеу Азия құрлығында жоғары беделге ие, сондықтан оны жеңіп алған спортшының халықаралық рейтингтік позициясы көтеріледі және болашақтағы мансаптық жолында үлкен мүмкіндіктерге ие болады. Дәулет үшін бұл жекпе-жек мансаптық тұрғыдан маңызды болды.

Шарада аралас жекпе-жек өнерінің қазақстандық өкілдері Дәулет Өсербай мен Сырым Бектұрсын кәсіпқой рингтегі дебюттік жекпе-жектерін өткізді. Олардың бұл алғашқы қадамдары Қазақстанда аралас жекпе-жек жанкүйерлерінің ерекше қызығушылығын тудырды. Спортшылардың рингтегі өнері көрермендерге жаңа әсер мен тамаша тартысты сәттер сыйлады.

Сонымен қатар, Қазақстан ұлттық құрамасының жас таланттары Фарух Тоқтасынов пен Ернұр Қайрат шаршы алаңға шығып, кәсіпқой рингтегі алғашқы жекпе-жектерін өткізді. Олардың спорттық мансабын жаңа деңгейге көтеруіне бұл кеш үлкен мүмкіндік болды. Бокс әлеміндегі болашағынан зор үміт күттіретін бұл екі жас боксшы алғашқы айқастарында ел намысын лайықты қорғауды мақсат етті.Алматылық кеште қазақстандық тағы бірнеше боксшы өз күштерін сынады. Сапарбай Айдаров, Сағадат Рахманқұлов, Тариел Жафаров, Абылай Сман және Жандарбек Кисимов секілді боксшылар да рингке шығып, өздерінің шеберліктерін көрермендерге паш етті.

Бұл бокс кеші — қазақстандық жанкүйерлер үшін ерекше мүмкіндіктердің бірі болды. Әлемдік деңгейдегі қазақстандық боксшылардың өнерін тамашалауға, жас боксшылардың алғашқы қадамдарына куә болуға әрі жаңа чемпиондардың пайда болуын бақылауға мол мүмкіндік берді.