Алан Бөрібаев Euronews телеарнасына сұхбат берді

23 қарашада Euronews арнасында «Астана Операның» бас дирижері, Қазақстанның еңбек сіңірген қайраткері, ҚР Мемлекеттік сыйлығының лауреаты Алан Бөрібаевпен сұхбат көрсетіледі. Маэстро журналистермен өзінің шығармашылық жолы туралы хикаясымен бөлісіп, сондай-ақ театрдың А.Жұбанов пен Л.Хамидидің «Абай» операсы сынды жарқын қойылымдары жайлы айтып берді. Бұл ұлттық өнер жауһары Отанымызда және одан тыс жерлерде көрермендерді бірнеше мәрте таңғалдырған еді.

 Алан Бөрібаев үшін бұл Euronews арнасындағы алғашқы сұхбат емес. Бұған дейін, яғни 2017 жылы ол арнамен өзінің тәжірибесімен және музыкалық өнерге деген көзқарасымен бөлісті. Оның жаңа сұхбаты ұлттық мәдениет үшін классикалық музыканың маңыздылығын айшықтайды.

2024 жылы тамызда ҚР Мәдениет және ақпарат министрлігі мен Euronews арасында Орталық Азия үшін Euronews өкілдігін ашу туралы келісімге қол қойылғанын атап өтуіміз керек.

Алан Бөрібаевтің жетекші халықаралық телеарналардың бірінің эфиріне шығуы оның әлемдік музыкалық мәдениетке қосқан үлесін көрсетіп, «Астана Операның» еліміздің бас театры ретіндегі дәрежесін нақтылайды.