Елордада «стереодыбыспен» ерекше шоу-концерт өтеді

30 қазанда «Астана Опера» сахнасында әлемге әйгілі дәулескер скрипкашы, Қазақстанның ізгі ниетті елшісі Марат Бисенғалиевтің ауқымды «Симфониялық концерті» өтеді. Елордада танымал музыкантпен кездесуді оның шығармашылығын ұнататын жандардың барлығы күтеді.

Концерт дирижері ретінде Марат Бисенғалиевтің өзі өнер көрсетеді, сондай-ақ ол скрипкада соло орындайды. Концерт солистер, мультиаспапшылар, «Астана Опера» хоры мен симфониялық оркестрінің шығармашылық күшін біріктіреді. Сахнада саксофоншы Арухат Мусаиповтың орындауында туындылар шырқалады. Оған әріптестері – дарынды мультиаспапшылар Серік Нұрмолдаев, Анар Қасымова, Абзал Арықбаев пен Асқар Солтанғазин қосылады. Сондай-ақ концертке жас вокалист Анна Юденич қатысады. Ал Қазақстанның еңбек сіңірген қайраткері Бейімбет Демеуов театрдың хорымен жұмыс істейді. Әртістер заманауи өңдеулермен және симфониялық оркестрдің үнімен жарасымды үйлесетін қазақ халық аспаптарының сан алуандылығын паш етеді.

Бағдарламадағы әрбір шығарма халқымыздың мәдениеті мен тұрмысының белгілі бір аспектілерін бейнелейді. Олардың қатарында «Дала», «Желсіз түнде жарық ай», «Айттым сәлем, Қаламқас», «Қарлығаш», «Дударай» және тағы басқалары бар. Жоба авторы әрі көркемдік жетекшісі, солист әрі дирижер Марат Бисенғалиев бұл концертте дәстүрлі қазақ музыкасына қазіргі заман призмасы арқылы өзінің көзқарасын білдіріп, оны заманауи, бірақ түп тамырына сай етіп көрсетеді деп күтілуде.

Марат Бисенғалиев – әлемдік жұлдыз, ең танымал қазақстандық скрипкашы екенін атап өту маңызды. Оның музыкалық мансабы әлемдік сахналардағы табысты өнер көрсетулердің ондаған жылдарын, үздік музыканттармен және оркестрлермен ынтымақтастықты, сондай-ақ қазақ музыкасын халықаралық аренада насихаттайтын жаңа жобаларды жасаудағы белсенді қызметін қамтиды. М.Бисенғалиев классикалық және ұлттық репертуарға инновациялық көзқарасымен және өзінің батыл интерпретацияларымен танымал. Оның «Ұлы дала әуені» сынды жобалары ұлттық сарындарды заманауи симфониялық дәстүрлермен үйлестірудегі шеберлікті паш етеді.

Концерттің басталуы 19:00-де.